JHADC-ni election result-rangko parakatani ja·mano West Jaintia Hills-o VPP dolna chakgipa manderang gitcham Nokmani nokko jinma chadrape nosto ka·aha. Ia manderang jinma re·angenba rong·terangko goruruaha aro noko donggiparangkoba saknaataha ine parakataha.
Police dolrangni u·iatanigitade, ia obosta Sutnga Narwan-o VPP dolna ka·oksie kam ka·giparang uamangni party-na chakpaaniko on·jahani gimin ding·chaoe ia kamko ka·aha. Sosojeng ong·anirang da·o nampilaha aro mikkangchi a·selrang dal·rorojanagita police dolrangkoba watdapataha ine East Jaintia Hills a·jani police aganangaha.
Mijal salo JHADC election-ni result-rangko parakataha jeon VPP dolrang dam 8 seat-rangosan chena man·aha. Uandake, NPP dol dam 13 seat-rango chee pilak party-rangni kosako bang·bate chegipa ong·aha. United Democratic Party (UDP) aro INC dolrang seat ge·gittamprakko cheaha aro sakgni Independent candidate-rangba constituency ge·gnio cheangskaaha.
