Election-o pu·ongiminrangko Sombar salo machote chanani ja·mano VPP dolrang dam 17 constituency-o chena man·e Khasi Hills Autonomous District Council (KHADC) o gitalgipa Executive Committee (EC) ko gipin party baksa bakrimgija VPP rikanggen ine VPP-ni President aro Nongkrem ni MLA Ardent Miller Basaiawmoit parakangaha.
KHADC election-o susagrikanio ge 29 seat oniko VPP dolrang ge 17 seat rangko man·ange bang·bate chegipa ong·angaha. Unbaksana Jaintia Hills Autonomous District Council (JHADC) election-o NPP dolrang ge 13 seat ko man·angaha aro VPP dolrang ge 8 seat rangko man·e gnigipa gadango ong·angskaaha.
Ia election-o bang·a neng·nikanirangko chagronge VPP ni kosako gipin party rangni adita tol·pinike matnanganirangko man·genchimoba namgipa gadango chu·sokna man·anina Ardent uni mittelpilskaani kattarangko aganangaha. Ian VPP ni kakketgipa bewalo EC ko rikna miksonganiko mesokan baksana batanggimin somoirango songni dilgiparang aro media rangni kosako kamrangko ka·angaha ine uamangko matnanganiba kakketgipa ong·ja ine Ardent agandapangaha. Ia gitalgipa EC ko VPP dolsaan rikna manchiani gisepo gipin party rang an·tangtangni man·gnina mangmang chanchiaigija bakrimna sikgiparangko rim·napnaba donga ine parakataha.
JHADC ni gimin aganengon, EC ko rikanio uamang dingtang mancha somoioko ra·e gipin party rang baksa name dake chanchirimaniko dakani ja·mano raiko on·anggen ine u·iatangaha. Unbaksana VPP dolrangni JHADC-o chu·ongagita seat rangko man·gijani ja·pangara gipin party rangni agre bilko jakkalani a·sel ong·a jeon manderang an·tangtangni nangnikagita pu·onaba man·tokjaha ine Ardent aganangaha. Iako agangengon, pu·onani somoio kajia golmal ong·gipa polling station rangonaba police dolrangko chu·ongagita sokatjaha ine ua agandapangaha.
