A∙dokni reservation policy ko dingtangatna miksonganiko nangnikjae North Garo Hills Job Reservation Policy Co-ordination Committee (NGHJRPCC) ni dilgiparang Expert Committee-ni Secretary L K. Diengdoh-na chitti see mol∙molataha.
Meghalaya a∙dokni Reservation Policy-ko Indian Constitution-ni Article 15(4) aro Article 16(4)-o dongimin niamrango pangchake ra∙gatesa an∙chingni a∙dokna dingtangmancha tang∙doanio aro poraia skianio ja∙manchakgipa jatrangko ra∙dona tarigimin ong∙a. Meghalaya-ni Job Reservation Policy-ko a·dokni jat gittam chong·motan Khasi, Jaintia aro A·chik jatrangna poraiani a·bao aro kamrangna rimnapanio darang jatkoba mikkang nitegija apsangrik ong·e sualna gitcham dilgiparang tik ka·e on∙angaha. Indake ong·oba, kakketko niatgenchimode batanggimin bilsirango A∙chik jatrang bilongen kal∙akaniko man∙an baksana man∙a nanggipa kamrangko gimaataona sokaha ine uamang janapataha.
Directorate of Economics & Statistics, Govt. of Meghalaya-ni 2022 bilsio census ka·e a·dok sorkario kam ka·giparangko chane mesokatanigitade, Scheduled Tribe-ni chu·gimik sak 56790-oni sak 35031 (61.69%)-nigitade Khasi aro Jaintia jatrangan bata aro A·chik jatrangde sak 19874 (35%) mangmangsan ong·aia ine u·iatangaha. Ia janapatgimin sakkirangko nie sorkarini kamrango baditana A·chik jatrang ja·manchakenganiko u·inagita man·aha. Meghalaya Job Reservation Policy-o Khasi Jaintia-na 40% aro Garo-rangna 40% ka·e suale on·aniara lekkaosa sea dongaia indiba sorkarini see rakkigiminko niatgenchimode iako da·onaba ja·rikgijaniko nikna man·enga.
A·chikrang indita bilsina galchipako man∙e rika cho·ani gadango aro chu·gimik tang·doanio ja·manchakoba ia dongimin reservation policy-o pangchake A∙chik jatni chadamberang sorkarini kamrangna aro chubata gadango poraina seokako man∙ani gisepon ia policy ko dingtangatanichi A∙chik jatna bilongen gimaataniko ra∙bagen. Kakketgipa survey ka∙anirangko niatgenchimoba A∙chik jatni bading chiwalani, poraia skia man∙gipa, kamna rimnapanio aro chubata gadango poraiani cholrang namen komikuengani gimin ia policy baditana kingking gamchataniko nikna man∙a ine parakataha.
Ia gimiko nigrikani ja∙mano Expert Committee-na adita ka∙na nanggni kam aro ku∙pattianirangko NGHJRPCC-ni dilgiparang janapataha. Socio-economic-o pangchake sorkarini segatgiminrangko name dake nipiltaie A∙chik jatna chamgimin quota-ko aro donggimin policy-ko dingtangatna nangnikgijaniko Committee ku∙pattiangaha. A∙chik jatni kosako kal∙akaniko aro reservation policy-ko dingtangatanichi A∙chik jatni man∙gniko komiataniara niamni a·palo ong∙engani gimin ia pilakkon Expert Committee name dake nipiltaiesa ja∙ku de∙china aganan baksana niamo pangchake bichal ka∙na man∙anikoba janapangaha. Unbaksana iani bidingo name talbate ma∙sie ra·china aro nipiltaianiko dakna skangba Committee-ni dilgiparang Garo Hills-ni pilak a∙jarangona re∙bae nie manderang baksa agan golpogrikanikoba dakna nanga ine uamang didiangaha.
