Da·al attamo Tura Goanang, Multifacility Complex-o battanggimin salo Assam Goalpara-ni NLF Rehabilitation Centre-o so·ota man·e janggi galanggipa A·chik chadambe saksa chong·motan Niksamseng Ch. Marak sagini janggina candle light service-ko ong·ate bi·chakangaha.
Ia bichaknagita tom·bimonganiko dingtang dingtang pressure group jekai ASPF, GSMC, AAYF dolrang dakdilangaha jeon Niksamseng Ch. Marak-ni nokdangni manderang, mahari ma·drangrang baksana uko ma·sigiparang aro battangimin obostani gimin knae u·igipa manderang sak 200 mangna bate re·bae bi·chake bakrimaniko mesokangaha.
Ia candle light service-o gittimni toromni padot pamongrang sianggipani janggina mombatirangko so·e bi·chakangaha. Ia somoio uni namgipa kamrangni giminba agananirangko dake uko gisik ra·angaha.
