An·ching pilakan ma·sia chong·motan, re·baenggipa 2024 Lok Sabha electionko April 19 tariko ong·atangna tik ka·angaha. Iani gisepon, bang·a dolrang da·o Garo Hills ni dingtang dingtang biaprangona wenroroe manderangoniko gamchatgipa vote ko am·na a·bachengtokaha. Sal somoirang bang·jahaoba susanasienggipa sakprakan ka·kimchae chenagita krengtokenga aro uamangni mikkangchi miksonganirangkoba manderangna talate on·tokenga.
Susanagiparangni ku·mikchetanirang aro miksonganirang namen dal·begipa ong·oba manderang kattarangko knae ra·e ian tik ong·gen ine basee songsalo kamrangko ka·na ja·ku de·anirangkoba an·ching nikna man·engaha. An·tangtangni chakgipakosan ong·niktoke jegrik dokgrikgiparangko nigenma, ringa cha·aniko man·a a·ba re·gipako aro tangka ra·chakgipako nigenma? Darangan election somoio man·gnina rika indiba mikkangchi bilsi 5 o maidake songsalna aro jatna dangdike on·gen ukode darangan nisamsotokja.
A·doko aro a·songko dilanggipa party rangoni chakatengiparangba uamangni kamrangko dal·nike batanggimin bilsirango dakgualaniko donnudape aganangenga, sorkario ong·enggipa party oni susaenggiparangba gital miksonganiko parakangtaie ong·anggipa a·selrangko guale agananggenok. Uarangko name chekriknagipade an·ching pu·ongipa ramram manderangsa ong·a. Nama namja basee kakketgipa dilgipako seokanian an·chingni daito ong·a aro songsalna namgniko ra·baaniba ong·a.
Manderangni nanganiko ma·mongona sokatna songdongenggipa jinmani palo ku·rangko on·china an·ching dilgipako seoka. Dilgiparangko seokengon an·ching skanggipa mandeni cholon bewalkosan niaigija, katta agana sapakosa me·sunikaigija, kakketgipa, ku·rang on·gipa aro gisik matsrame biljrimgipakosa nina nanga. Jedakode mikkangchi uan an·ching sakantini sepi gita chacha aro ma·a paani dedrangko bamgope nirokgipa gita dilgipa ong·gen.
India a·song ge·sa dal·begipa democratic a·song ong·a aro politics ia a·songo namen ning·tubegipa a·ba ong·a. Chasong rikkit politics ni ramarang dingtanggipa bimang ong·angengaha jeon namgni ba namgijaniba gnang. Ian dilgiparangni an·chingko nirokani aro kam ka·e dangdike on·aniosa pangchaka. Uni giminsa an·chingna gisik a·ning bitgipa aro u·i-ma·sigipa dilgiparangko nanga.
April 19 tariko an·ching saksa dilgipako Lok Sabha MP na seoke watatgen, ua sal an·chingna namen katchabeani ong·nasienga. An·ching ia Lok Sabha election o dilgipako seokengon jatna ka·sagipa, bimchipgipa aro manderangni ku·rangrangko kosakona sokatna bil gnanggipakosa seokna nanggen. Nambatgipa dilgipako baseanian an·chingni nokdangna, a·dokna aro a·song gimikna namgniko ra·baani ong·a.
