2024 bilsini HSSLC ni Science aro Commerce porikkao mongsongbate Shillong ni skul aro college rango poraibagiparang namgipa gadangni result ko man∙e chu∙sokgiparang ong∙angaha. Science stream-o Laban Bengalee Higher Secondary School, Shillong ni Sohan Bhattacharjee aro Commerce stream-o St. Mary’s Higher Secondary School, Shillong ni Ferry Filarisha Wann (Commerce) skanggipa gadangrangko man·e chu·sokgipa ong·angaha.
Pangna bilsian ia porikkarango an∙chingni A∙chik chadamberang top 10 ni gadangona sokdona man·gijaniko nikrongbaenga. Apsan daken ia bilsini HSSLC result oba A∙chik chadamberang ua gadangona sokdoangjaha jeon Commerce stream o Tura Don Bosco College-ni Aditya Prasad gittamgipa gadangko man∙ange Garo Hills ni saksakamkam ong∙e rasongko ra∙baaha.
Re∙anggipa 2023 bilsini HSSLC porrikkani result-o Science stream ni pass percentage 78.84%, Commerce stream ni 79.31%, aro chu∙gimik 79% ong∙a. Iarangko niatgenchimode Meghalaya a∙doko ia bilsini pass percentage-o aditan nambataniko aro tang∙doaniko nikangna man∙aha. 2024 HSSLC porikka seanio Science stream ni pass percentage 85.24% ong∙a jeon me∙asa chatrorangni 87.27% aro me∙chik chatrirangni 87.03% mangona tang∙doangaha. Apsan daken Commerce stream ni pass percentage 80.26% ong∙a jeon me∙asa chatrorangni 80.81% aro me∙chik chatrirangni 86.07% mangona tang∙doangaha.
Ia chango A∙chik chatro chatrirang top 10 o bimung nakatna bang∙gija mark rang komianichisa sokdogijanikoba nikna man∙angaha. Iako aganengon ia bilsini Science stream-o bon∙kamgipa gadang jean 10 position ni chu∙gimik man∙gipa mark ara 454 ong∙a jeon A∙chik chadamberangoni saksa St. Anthony’s College, Shillong-o poraibagipa Akhistar R. Marak chu∙gimik 438 mark rangko man∙e mark 16 mangmangchi komirikaha. Iana agre gipin chatro chatrirangba indakgipa apsan obostani gimin sokdoangjaha aro ian mikkang changona an∙chingni Garo Hills ni A∙chik chadamberangni rakbee aro tikkele susaanirangkoba mesokangenga.
Garo Hills o kraagitan nambegipa skul aro college rangko re∙baenggipa bilsirango namdapatna aro tang∙doatna man∙genchimode mikkangchi an∙chingni A∙chik chadamberangni namgipa gadango chu∙sokaniko nikna ka∙dongsoenga. Iasan ong∙aigija an∙chingni bi∙sarang skulo a∙bachenggipa gadangrango skie ra∙anikoba bilakatna nangchongmotenga maina ian uamangni mikkangchi lekka poraianio sapaniko tarisamsogipa ong∙anggen.
