South West Garo Hills a·jani Electoral Office, Lok Sabha election na photo rang baksa chappa ka·gimin electoral roll rangko, dingtang dingtang party ni dolrangna a·jani Additional Deputy Commissioner, RZ D. Shira, sakgni ADC rang Rezina Marak aro Mary Lisa Sangma ni dongpaanio suale on·angaha.
Somoinigita dingtangate tarigimin electoral roll rangko susaenggipa dolrangna suale on·ani miksonganiara, election ko name aro kakket bewalo ong·atangna jotton ka·ani ong·a. Ia tale segatgimin electoral roll chi election ko ong·atanio ka·donganiko ra·bana ja·ku de·ani aro susaenggipa dolrangna namgipa chanchisoanirangko tarisona dakchakaniba ong·a.
Electoral roll rangko nina, SWGH a·jani District Election Officer ni Office, BDO office aro pilak Booth Level Officer rangoniko uamangni polling station rangoniko man·anggen.
