Assembly Budget session ni brigipa salo, gitalgipa programko sorkarini a·bachengatna miksonggipa Chief Minister’s Scholarship Scheme ko re·baenggipa financial year oni chatro chatrirangna on·angna tik ka·aniko Chief Minister Conrad Sangma parakataha.
Ia scholarship nigita post matriculate ba matric see pass ka·mangipa pilak chatro chatrirangna bilsi prako tangka gong 6,000 ko on·anggen ine Sangma aganangaha. Ia scheme na dingtang mancha tangka gong 48 crore ko chamataha jekon a·dokni sak 80,000 chadamberang namgniko man·anggen ineba Chief Minister parakangaha.
Iako aganengon, ma·mong sorkarini on·enggipa scholarship baksa ia scheme nigitaba chatro chatrirangna gong 6,000 tangka paisarangko on·dapanichi dakchakaniko mikkangchi man·anggen ine Sangma agandapangaha.
Unbaksana batanggimin somoirango galgimin scholarship rangko da·o dipet man·kujaniara ma·mong sorkarini tangka rangko somoigita sokatjani a·sel ong·enga ine Sangma aganangaha. Mikkangchi chatro chatrirangna maikai uamangni scholarship ko somoigita on·ani cholkoba sorkari kamrangko ka·anggen ineba u·iatangaha.
