Guwahati-Mendipathar gita Baghmara oni Bangladesh a·songni Dhaka ona rel gariko ra·bachina dabie South Garo Hills ni MLA rang Meghalaya ni Chief Minister Conrad Sangma na Memorandum ko on·ani bidingo Garoland State Movement Committee (GSMC), CEC, HQ, Tura ni Organising Secretary Jason Tekrang M Sangma dolni palo raken jegalangaha.
Chong·motan rel gariko Bangladesh oni Garo Hills ona ra·bana skang Inner Line Permit (ILP) ko a·doko ra·gate on·chengna man·ode Achik a·songona niam gri napsrukbaanirangko chelchakna mangen ine GSMC dol janapangaha. Indake ia rel gariko a·song damgnini gisepo re·rurana gita dabiengon niam gri napsrukbaanirangko champengna gita cholko Megahalaya sorkari nigita ja·ku de·angengama ineba sing·doangaha.
Da·alo Garo hills o mongsongbate Meghalaya aro Assam ni sima arirango aro Bangladesh a·song baksa nangchapgipa adita A·chik songrang jekai Mahendraganj aro gipin biaprango a·paloni gipin jatrangni napsrukbae songdong a·chaanirangko nikna man·engani gimin, niam gri napsruke dongenggipa gipin a·dok ba gipin a·songni manderangko sandie watatpilani kam kosa sorkari ka·na nangenga ine aganangaha.
Indake niam gri napsrukbaaniko champengna man·agita, A·chik a·songni manderangni nangnike dabienggipa ILP ko ra·gatchenge on·a nangchongmotaniko aganangaha. Unbaksana A·chik a·songni manderang Winter Capital koba Tura-o songe on·china dabienggipako ra·bana man·genchimode A·chik a·songni manderangnaba bang·a namgnirangko ra·bana dakchakgenchim ine GSMC janapataha.
Ia kamrangko chu·sokate on·chengna nanganina pilak A·chik a·songni MLA rangko ILP aro Winter Capital na dabianio jak on·pae kamrangko ka·pachinaba GSMC dolrang mol·molangaha.
