East Garo Hills, Megagre songo Jal Jeevan Mission (JJM) ko ra·bae on·omangba name tarie on·jani a·sel Megagre songni manderang, Garo Hills Youth Solidarity (SHYS) baksa bakrime Williamnagar PHE Department ona chitti-ko sedoataha.
Megagre songo chu·gimik te 85 nokrangoni te 70 nokrango tekgimin JJM pipe-rangoni chirangko man·kujaenga. PHE Department-ona changni chang iani bidingo koborko on·atani ja·manba re·baeba nia dongkuja aro da·ona kingkingba ia nokrango chi man·a dongkuja. Re·baenggipa somoirango uamang kachariona ra·gatangnaba u·iatangaha maina manderangni neng·nikani aro nangnikanina maming ja·ku ga·a dongjaode ma·mongoni namgipa project-ko ra·baani namgni grigipa ong·a jean tangka cha·ani, tol·pinikani aro gamchate ra·gijani ong·a ine aganskaaha.
Ia JJM project-ko nokantiona jekai paikana, babilsi aro bathroom-rangona chi sokatna ma·mong sorkarini chanchigimin miksongani ong·genchimoba Megagre songode sa·raona pipe ge·samangmang sale on·gipao da·onaba chi jokkujaenga aro JJM-niko chi ringmaneba nikujaenga ine uamang janapataha.
Iarangan, corruption ba tangkarangko cha·minokani a·sel ong·enga jean bisigrakgita chacha ong·a aro a·jao salsa batrikrik namjabatroroenga ine aganangkuaha. Indakgipa namgijagipa kamrangko bon·atna PHE department-ko nirokate kam ka·china aro ia songo JJM project-ko name tarie on·gijani bidingo contractor-ko re·bae nirokchinaba uamang jinmani palo didiatangaha.
