Da·al salni bako, Tura District Auditorium o a·dokni Chief Minister Conrad Sangma ni jakchi Greater Tura Urban Water Supply scheme ko a·bachengatna pangchakani ro·ongko songangaha. Ia scheme ko a·bachengatanichi Meghalaya a·dokni pilak nokrangna chi-ko sokatna miksonganiko chu·sokatani ong·a.
PHE ni Minister, Principal Secretary, Public Health and Engineering Department (PHED) ni officer-rang ni dakchakanichi project ko ra·bae on·anina Chief Minister mitelangaha aro Tura ni manderangna da·al salko Red Letter Day ni sal ine mingangaha. Tura songjinmao chi na dilaniko niroke ia project ni gita chi chimongchakram biap, tourism ni biap ko a·bachengatna, fishery department-rangna bosturang aro ge·a gamani chi rangko sokatna dakchakanggen ine Sangma aganangaha.
Ia project ko 2004 bilsion, (L) P A. Sangma ni dongmitingo bimang ong·ataha jekon 2018 bilsioni a·bachengatna manchiangenchimoba bang·a neng·nikarangko man·ani a·sel a·bachengatna man·jaha. Ia project ko chang·satai ma·mong sorkari ni gong 400 crore ko on·e dakchakanichi ja 24 ba ja 26 ni gisepo matchotatna tik ka·angenga aro project ko a·bachengate chi ko chimongchakna biap tarimitingo Nokma rangni rai ko on·china mol·molangaha ine Sangma aganangaha.
Una agreba ia bilsio bijoliko den·galani dongjawa ine aganan baksana gitalgipa Administrative Complex ni rikani cho·aniko a·bachengatengaha, IT Park ni project ko matchote on·ani ja·mano chadamberangna kam rangko tikatna chol on·anggen aro Tura Baljek aro gipin rika cho·ani kamrangko ka·angenga ine janapangaha. Tura Beautification Project ni gnigipa baknigita sorokrango lightrangko chingataniko dakna tik ka·angaha aro Tura o songdongenggipa manderangko rongtal an·talaniko dakchina aro saksa sakgipin baksa tom·tome janggi tangchina Sangma aganangaha.
Ia programni gisepon Prime Tourism Vehicle ko man·giparangna gari ni chabirangko sualangaha, JJM aro Greater Tura Urban Water Supply scheme ni jawilwatrangko mesoke on·angaha. Ia programo Principal Secretary Syed M A Razi, PHE Department ni BM Lyndem, West Garo Hills ni Deputy Commissioner Jagdish Chelani adita kattarangko aganangaha. West Garo Hills ni Superintendent of Police Abraham T Sangma, Tura MBOSE-ni Executive Chairman CP Marak, PHE ni officer-rang, dingtang dingtang Department ni dilgiparang, senior citizen aro Development Committee ni memberrangba bakko ra·angtokaha.
