Selsella Jolo Jal Jeevan Mission (JJM) scheme-ni matchotgijanichi songdongenggipa manderang neng·nikanirangko man·enganina nangrimgimin NGO dolrang jekai ASWA, FKJGP, GSU aro ADE dolrang PHE Minister Marcuise Marak na chittiko sedoataha. A·doko JJM scheme-ni kamrangko sorkari matchotaniko parakatmanahaoba Selsella jolni adita songrango ringna namgipa chirang sokujaenga ine uamang parakataha.
Selsella-ni ning·o ga·akgipa Amguri, Mandagre, Singgimari, Apalgre, Wakantagre, Nengkalpara, Chondra, Ramjong, Kudaldua, Abima, Singwilgre aro Sarbila songrango chirangko man·jae neng·nikanirangko chagrongenga ine NGO dolrang u·iatangaha. Ia songrango adita project-rang matchotkujaenga aro mitamrango matchotaha ine segatgenchimoba songni manderang chu·ongagita chirangko man·kujaenga ineba uamang talatangaha.
Selsella-o mande jelanichi salantio chirangko jakkalna ia project-o ka·donganiko man·genchimoba chirangko chu·onge man·kujaengani gimin manderangni be·en bimang, rongtal an·talani aro an·seng baljokanio neng·nikaniko ra·baskaenga ine uamang aganangaha. Ia janapgimin songrango JJM-ni kamrangko nipiltaie ta∙rakale nirokate ringna namgipa chirangko nokantiona sokatchina NGO dolrang PHE Minister ko mol·molataha.
