Tura District Cricket Association (TDCA) ni Inter Club Tournament 2023-24 ko ong·atanio, ia bilsio susaanirang bilongen an·saobee matchotangaha jeon re∙anggipa bilsio susae nambatgipa dol 9 ko elite Group A ona donatako man·aha aro bangki dolrangko Group B-o susanagita donatako man·skaaha. Ia tournament-o susaanggipa nambatgipa dolrangko uamangni changa sapaniko jakkalna cholko on·an baksana Group B-ni nambatgipa dolgniko elite group-ona ra∙doataha.
Group B-ni nambatgipa dolrangara East Town Sports Association, Williamnagar aro Tura Bazar Cricket Club-rang ong·a jemaangan changanti kal·susaanion nambee kal·anichi re·baenggipa season-o Group A-ni namgipa dolrang baksa susanagita cholko man·anggen ine u·iatangaha. Cricket kal·anio niksenggipa Dippu Sangma, Chekam Sangma, Kishan Lyngdoh, Ram Gurung, Pringsang Sangma, Arien Bonchang Sangma, Kilco Marak, Tengchan Sangma, Bonkam Marak aro gipinrangba ia tournament-o bakko ra·angaha.
Mijal salni bako League championship-ni bon·kamgipa kal·susaanio Miracle dol baksa Krimkro dolrang susaangaha jeon dolgnian apsan point rangko man·e bang·gija kal·a gimikni run rate-chisa dingtangatna man·angaha. Unbaksana mikka waanichi kal·aniko adita somoina sengatna nangaha aro over 20 ona ra·onate kal·ataona sokaha. Bisil godoanio Miracle dolrang chee dokchengna tik ka·angaha jeon nambegipa nisanko tarie re·anggipa bilisini chegipa dol Krimkro-na rakbegipa susagrikaniko on∙angaha.
Miracle dolni dokgiparang over 19.4 o bon·kamgipa wicket-ko ga·akate chu·gimik 193 run rangko tariaha. Miracle dolna bang·bate run rangko doke on·giparangara Arien Bonchang jean 51 runko dokaha, Lerry 30 run aro Ram Gurung 27 run ko doltangna tariangaha. Uamangni run rangko tarianiko neng·nikatnagita Krimkro dolni Kilco nambee robol goanichi wicket 3 ko ga·akatskana man·aha.
Miracle dolni tarigimin nisan ko amnagita Krimkro dolrang gisik nangbee jotton ka·genchimoba rongsa ball-o run 6 ko nange wicket 7 ko ga·akate chu·gimik over-o 188 run rangkosan ma∙naiaha. Krimkro dolni Tengchan doltangna nambee kal·angaha jeon ua 90 run rangko tariangaha.
Dolgnian namen biltinggrike kal·susaangaha jeon Krimkro dolrang run 5 chi komie Miracle dol baksa sirikaha. Miracle dolrang league championship-o chegipa ong·aha aro uamang dolgnini nambee kal·e mesokanichi cricket kal·na gisiko nanggiparangna ga·subegipa susae mesokani ong·angaha.
