Tura Don Bosco College-o P. A Sangma Memorial Basketball Tournament 2025-ni final-ko Sangkni aro SYM (Salesian Youth Movement) ni gisepo kal·susaanio SYM dol chegipa ong·aha.
Ia tournament-ko Tura Basketball Club ong·atangaha aro ia susaanio Meghalaya-ni dingtang dingtang bakoni kal·na re·batokaha. Tournament-o chu·gimik dol chigni mang susagrikangaha jeon Robin-League format-o a·bachengate league match aro knock-out dake kal·atangaha. Bakko ra·anggiparangoni Meghalaya a·doknisan ong·aigija national level-o kal·giparangba sokbatokaha.
Ia tournament-ko Chief Minister’s Special Grant-ni dakchakanichi aro West Garo Hills District Administration aro Garo Hills Autonomous District Council-oniba dakchakaniko sokataha. Nivia Sports Pvt Ltd, The Meghalayan Express aro Hub New tournament ko co-sponsor ka·angaha.
West Garo Hills-ni Deputy Commissioner Jagdish Chelani mongsonggipa sokgipa ong·aha aro Meghalaya Mineral Development Corporation-ni Vice Chairman Raymond Sangma guest of honour ong·e sokbaaha. Assistant Commissioner Chaitanya Awasthi, Video Analyst Salmitmat Marak, BCCI aro Rev. Fr. Januarius S. Sangma, SDB aro Don Bosco College-ni Principal final-ona okamatako man·e re·baaha.
A·bachenggipa quater-oni Sangkni dolni kosako SYM dol kraa point-rangko man·e skangsoe dongaha. Indioba gittamgipa quater-o sni point-rangchi Sangkni dol rake kal·enba SYM-ni kosako tang·dona man·skaaha. Brigipa quarter-o SYM rakbate kal·taeming 69-62 point-rangchi Sangkni dolko amatenba 2025 P. A Sangma Memorial Basketball Tournament-ni chegipa ong·angaha.
Cheanggipa SYM dolna gong hajal 50,000 aro trophy-ko on·aha aro Sangkni dolnaba gong hajal 25000 baksa apsandake trophy ko on·angaha. Player of the match-ko SYM ni Renaldy Jyrwa man·aha aro Player of the Tournament title-ko apsan dolonin Arbas Ali Shah man·angskaaha.
