Meghalaya a·doko railway-ko apalbatatna ma·mongni chamatgipako opposition aro bang·a dolrangni nangnikjae jegalani gimin Education Minister Rakkam Sangma aro unbaksa gipin SGH-ni MLA-rang Baghmara-ona ra·baskachina Chief Minister Conrad Sangma-o mol·molna tik ka·aniko parakangaha. Ia rel ramarangko ra·bae on·genchimode bading chiwalanirangoba chol·guga ge·sagita ong·e ru·uta somoirangna gipino pangchakgija jakgitel ong·e dingtangmancha South Garo Hills-na bading chiwale cha·anirango dakchakani ong·gen. Ge·sa a·dokoni ge·gipinona re·runana ramarang aro cholrang dongosa manderangni janggi tanganio pilaknigita tang·doaniko ra·bana bil ama ine Rakkam Sangma aganangkuaha.
Iani bidingo Rakkam Sangma aro gipin sakbri MLA-rang apsan nangrime Guwahati-Mendipathar-Baghmara aro Dhaka-ona rel ramarangko baridapate on·china Chief Minister-ko grongenba memorandum-ko on·anggen ine Education Minister aganangaha. Indake ong·genchimoba, niamni a·palo napsrukbaenggipa manderangko nirikinagita check-point rangko ra·bana nangani gamchataniko janape Sangma aganangjolaha.
Meghalaya a·doko ge·gni railway project-rangko gipin a·songoni niamni a·palo napsrukgipa manderangna maming niamrangko tarisamsoani dongjani a·selo namnikjae Khasi Hills aro Jaintia Hills-o jegalaniko dakangaha. Indake ong·engon, ma·mongni chamatgimin ia gong 300 crore tangkarangko ma·mong sorkari watpilchina janapataniko Conrad Sangma re·anggipa antio parakangaha.
