South West Garo Hills Garobadha ni Dumnigaon o Meghalaya Koch Association (MKA) ni chang 55 gipa annual conference ko February 21 tarikoni 23 tarikona ong·atgipa matchotanga.
Ia conference ko Ampati Ghasura ni Meghalaya Koch Association ong·atangaha aro iano jatni manianirangko, songsalo ong·enggipa obostarangni gimin mikratani aro agangolpogrikanirangko dakangaha. Ia conference ona songsalni dilgiparang, poraia skia donggiparang, gipin a·dokni dilgiparang aro Nepal oni ba re·bae bakko ra·angtokaha.
Ia conference ko Devpratim Koch ni ku·rangchi aro Kandarpa Koch ni segimin “Sona Kocho” minggipa gitko wate a·bachengataha. February 22 tariko MKA ni President Jibananda Koch, association ni flag ba nisan ko songange association ko a·bachengatgiparangko mande ra·aniko dakangaha. Ia conference o songsalo ong·gipa obostarangni gimin mikrakataniko ja·pang donangaha jeon Meghalaya Koch Association, Koch Krorang Mathop (Koch Literature Society) aro Meghalaya Koch Women Welfare Association bakko ra·angtokaha.
Songsalo jatna mikkim rasongko ra·bagiparangko mittelangaha aro iano gital MCS Ashish Koch, NCC gold medalist Rohesh Koch, Koro Ganchongni director aro jawilwat tarigipa Pranami Koch, Horolyn Koch Shadap aro Banai Koch ba sokbae dongangpaaha. Ashish Koch, Koch jatko pora skiani ko gamchate ra·china jinmana aganangaha. Una agreba Nepal, West Bengal aro Assam ni dilgiparang baksa gipin a·dokrang aro sima ari jolo donggipa Koch rang baksa bakrimaniko bilakatna golpogrikaniko dakangaha.
Literary session o Karbi Anglong ni Professor Bhabesh Koch, Mankachar College ni Professor Jeuti Khamti aro Assam ni Linguist Pranshu Munjal ba re·bae Koch ku·sikko maikai ripinge rakkina aro gipatna nanganiko chanchirimangaha.
Open session o Rangsakona ni MLA Subir M. Marak mongsonggipa sokgipa ong·e bakko ra·angaha. Meghalaya Khadi & Village Industries Board ni Chairman, Dengnakpara ni MDC Sadhiarani M. Sangma, Tura GHADC ni Deputy Chairman Pramod Koch, Betasing MDC Sanjay Koch, gitcham MDC Premanando Koch aro Nripendra Koch ba ia conference ona re·bae bakko ra·angtokaha.
