Bharatiya Janata Party (BJP)-ni bewalgita ja·rike Voice of the People Party (VPP) dolrangni toromko nangrimate kam ka·enganina Congress-ni dilgipa Vincent H Pala matnange aganangaha.
Ia gitalgipa political dol uamangni election-na tom·anirango toromko man·chape kamrangko ka·enga. Indake politics baksa toromko nangchapatanian kenbeani ong·a ine Vincent Pala aganangaha. Politics baksa toromko man·chape Pakistan, Hamas aro Syria a·songrangoba kamko ka·angaha, indake dakaniara ru·utaona chu·sokgipa ong·rongja ine Pala aganangkuaha.
VPP dol-ni election-na campaign ka·anio dongpagenchimode, giljao skiprakao dongagita an·tangkon chanchipilgen ine Vincent Pala aganangaha. Meghalaya a·doko Christian aro gipin ma·malrangba songdongengani gimin toromnigita maikai politics baksa nangchapatgen ineba Pala sing·doangaha.
VPP dol-ni daka rika bewalrangan BJP dol baksa apsan dakgipa ong·enga. Uamang torom aro reservation-ko jakkale manderangko dingtangatenga ineba Pala agandapangaha. Uamangni ku·rachakgimin kattarangni kam baksa apsan ong·gijaniko manderang nikna gitaba man·engaha ine Vincent Pala aganangaha.
Ia kattarangko ua re·baenggipa February 22 tariko ong·atnasienggipa Jaintia Hills Autonomous District Council (JHADC) election-na sak 18 susanasienggiparangko seokani ja·mano kobor ra·timgiparangna aganangaha.
