West Garo Hills, Dadenggre Civil Sub-Division jolniko sakgittam dosi gnanggipa manderangko pistol aro matsramgipa degal baksa mijal walni bako WGH-ni pulis dolrang rimna man·aha.
Ia ong·a obosta pulis dolrangni dakronga gita Chibonggre song sambao reroroe nirikianiko dakmiting somoio Maruti Alto gari gipok bolsani re·baenganiko niksoe pulis dolrang mikkangchakgrike champengsona man·aha. Pulis dolrangni neng·takatako nikatenba gariko sale katna jotton ka·genchimoba rama apchangket ong·ani a·selo sale katna gita man·jaha ine pulis dolrang u·iataha.
Dosi gnanggipa manderangoni saksade garioni chokone kattenba andalgipa buringchina kate jokna man·ange sakgittam manderangko mangmangsan rim·rikna man·skaaha. Uamangni Alto gari registration AS 18 K 6601 oniko am·sandianiko dakon 7.65 mm pistol, matsramgipa degal, ba·ra gisim bichit, sko ba gitoko katipna jakkalgipa ba·ra ge·sa aro mobile ge·gittam-ko man·aha.
Rim·a man·gipa manderangara Assam Khardang songni Hemjit Rabha (32), Anogre-ni Lakingstone Marak (30), Kama Dorenggre songni Rikkam D Sangma (27) ong·a. Ia ong·gipa obostani bidingo talbate ma·sina gita sing·sandianirangko pulis dolrang dakangenga.
