North Eastern Hills University (NEHU) o sosojengjeng ong·ani batroroani gisepo Robibar salo ma·sina man·gijagipa manderang Vice Chancellor Prabha Shankar Shukla-ni dongchakenggipa quarter nokko nosto ka·aha. Nokko nisiatani somoio VC-ni donganiko ma·sina man·kujaenga jekon DGP Idashisha Nongrang-ni u·iatanigita uamangni sokangon VC-ko grongejaha ine parakangaha. Chadrapani konta 10 batpilahaoba da·ona kingking VC gimakuenga aro Registrar unbaksana gipin official-rango sing·on VC-ni dongchakenggipa biapko ma·sitokjaha.
Ia kamko ka·gipa manderang CCTV camera aro bijoli krongrangkoba nosto ka·angaha. Sing·sandianio ma·sianigitade VC-ni quater-ni CCTV camera-rang kam ka·jaha ine u·iataha. Iani bidingo dikdiksana daitoko ra·enggipa Registrar Mawlai police thanao mokor domako segatangaha aro bikan am·sandiani kamrangkoba a·bachengataha. NEHU-o ong·enggipa ding·chaoenggipa obostarangko dontongatna Chief Minister Conrad Sangma-ba ma·mongni Education Minister Dharmendra Pradhan-ko nirokate namgipa cholrangko ra·bachina mol·molangaha.
NEHU-ni chatro chatrirangni dabienggipako VC nirokatna uamangni nangnikagita kamrangko ka·na Executive Council-ni tom·aniko ta·rake ong·atna a mol·molmanani gisepon da·o ia a·selrang ong·aha. Unbaksana VC dingtang mancha NEHU Students’ Union (NEHUSU) ko namgipa golpogrikaniko dakna aganangaha. Indake ong·genchimoba uamang golpogrikna raken jegalataha aro VC kamoni ong·katosa jingjengataniko dontonggen ine parakangaha. Registrar, Deputy Registrar aro skianio sapgijagipa teaching aro non-teaching staff-rangko kamo rakkiani tik ong·gijanirangan chatro chatrirangni jingjengatani mongsonggipa ja·pangrang ong·a. Uamang kamna sapgijagipa NEHU-o rakkienggipa manderangko ra·galchina dabiangenga.
