Electoral Roll 2025 ni Special Summary Revision ko da·al salo Deputy Commissioner Office, Tura ni DRDA Conference Hall-o ong·ate West Garo Hills ni dam 11 Assembly Constituency rangna Draft Electoral Roll ko Election Commission of India, New Delhi-ni u·iatgimino pangchake dingtang dingtang political party rangna pakwate on∙angaha.
Ia Special Summary Revision ko a∙bachengatani miksonganiara electoral roll ko maming sesreta gri tarie on·a aro pu·ona kragipa sakantikon galchanggija bimung segatani ong·a. Election Commission of India ni on·gimin somoio jean 2024 bilsini October 29 tarikoni November 28 tarikona maiba kangani aro jegalanirang donggenchimode polling station tangtango Booth Level Officers rangni donganio ka·angna man·gen ine u∙iatangaha.
Electoral Roll-o segatgimin gita dam 11 Assembly Constituency rango chu∙gimik 547 polling stationrango 379024 pu·ona man·giparang gnang jeonin sak 189287 me∙asarang, sak 189736 me∙chikrang aro me∙a me∙chik dolo ga∙akgijagipa sak 1 ong·a.
Ia tom·anio West Garo Hills ni Additional Deputy Commissioner (Election In-Charge) Nippon Hajong, Additional Deputy Commissioner Rojalinda D Shira aro Mary Liza Marak aro gipin political party na kam ka·giparang sokbae bako ra∙angtokaha.
