Ia chang Me∙gong festival-o mingsinggipa aro doka dam∙anio a∙gilsak gimiko niksenggipa EUROPE band re∙bana am∙enganiko official ong∙e parakataha. Uamang November 30 tariko West Garo Hills Baljek Airport-o dakmesokanichi manderangko an∙saowatanggen.
EUROPE, Sweden a∙songoni ge∙sa rock band ong∙a. Uamangni gitrang aro music-ko a∙gilsak gimikan knatoka jean manderangni gisiko aro ka∙tongo da∙o kingkingba dongkamenga. Europe band, bang∙a mingsinggipa gitrang jekai Final Countdown, Carrie, Prisoners In Paradise, Open Your Heart, Rock The Night, I’ll Cry For You aro bang∙a mingsinggipa gitrangko ringangaha.
Ia chang Me∙gong festival-o re∙baenggipa gipin dolrangara Indus Creed, Shanka Tribe, Euphoria, unbaksana a∙doktangni dolrang jekai Da Suraka, Haystack Ladies, Summersalt aro salgnini gisepo gipin band-rangni dakmesokanikoba nikanggen.
