Songsalni namgnina kam ka·enggipa saksa social activist Greneth M. Sangma, Meghalaya a·doko Sixth Schedule-ni ning·o man·gipa biaprango Tribal Tax Exemption Certificate-ko ra·na online system-ko a·bachengatchina Chief Minister Conrad Sangma-ko mol·molataha.
Income Tax Act, 1961 Section 10(26)-o kajina gamna galchanganiko Tripura, Mizoram, Manipur, Nagaland, Assam, Arunachal Pradesh aro Jammu & Kashmir-ni Ladakh jolo songdonggiparangna Schedule Tribe-rangna bil on·manaha. Apsandaken, Meghalaya a·dokba Sixth Schedule-ni ning·o man·ani gimin galchangani gnang. Indake ong·genchimoba, ia certificate-rangko ra·na da·o ja·rikenggipa niamrang namen neng·nikbegipa aro somoi nanggiparang ong·enga ine Sangma parakataha.
Iani bidingo Assam aro Mizoram a·dokrango online system-ko ra·gatahani gimin, Meghalaya a·dokoba online portal-ko kulichina, lekka pancharangko nirokna cholrangko tarichina aro manderang altuae certificate-rangko ra·na man·agita a·bachengatchina Sangma ku·pattiataha. Iarangko dakanichi sorkarinaba songdonggipa manderangna cholko on·a nengrabatatgen, administration-ni bojako ritchengatgen, tribal-rangni bilko rakkiani aro Income Tax Act, 1961 Section 10(26)-o kajina gamaniko galchangani ong·gen ine Sangma agandapangaha.
