Gambegre by-election ong·na sepangrorobaengon, ia chango gipin dolrangko changale NPP aro TMC dolgnini gisepo biltinggrik susaani ong·gen ine NPP party-ni dilgipa aro Working President, Marcuise N. Marak aganangaha. Marak, dingtangmancha Congress dolko janapange Gambegre by election-o bilakbate susanasienggipa dolrangoni Congress party-ko galchange aganangskaaha.
NPP dolrang absolute majority ong·e sak 31 MLA-rang aro MDA sorkario bakrimgipa gipin MLA-rangni dongpaanio Marak ka·donganiko parake manderang sorkariko chalaienggipa dolnan pu·ontokgen ine aganangaha.
Re·anggipa changoba Sadhiarani Sangma, chong·motan da·o susanasienggipa gitcham Rangsakona-ni MLA Zenith Sangma-ni jikgipa Gambegre constituency-o gnigipa ong·angaha. Indake ong·genchimoba ia chang sorkariko rikenggipa NPP doloni Chief Minister-ni jikgipa Mehtab Chandee aro Tura-ni MDC Bernard Marak-ni susaanio bakko ra·anichi namen bilakgipa dakgrikani ong·na ka·dongsoenga.
TMC-ni dilgipa aro gitchambegipa politician Dr. Mukul Sangma-ba Gambegre constituency-ko wenna a·bachengaha jeon uamangni doloni MDC ong·enggipa donganichi NPP-na susaanio rake dakgrikna nanggen ine Marcuise Marak parakangaha.
