Mea∙sa aro me∙chik dolrangna kal∙atgipa Inter Mahari Football Tournament 2024 Sonibar attam, September 21 tariko final kal∙susaanio Bolwari aro Chambugong maharirang chegipa ong∙angaha. Ian 4-gipa changna mea∙sa dolrangna kal∙atgipa tournament ong∙a aro 2-gipa changna me∙chik dolrangna kal∙atgipa tournament ong∙skaaha.
Mea∙sa dolrangni kal∙susaani Bolwari maharirang goal 3-1 ko 2023 bilsini tournament-o chegipa Agitok maharini kosako chipna man∙e chegipa ong∙angaha jeon Bolwari maharini Chekam B Marak hat-trick man∙angaha. Me∙chik dolrangni kal∙susaani Chambugong maharirang goal 4-1 ko Mangsang maharini kosako chipna man∙e chegipa ong∙angskaaha.
Ia kal∙susaaniona Chief Minister Conrad Sangma mongsonggipa ong∙e sokbae, tournament ko ong∙atgipa organiser aro pilak kam ka∙giparangni bimchipanichi name chu∙sokatna man∙anina mittelpilskaani kattarangko aganangaha. Unbaksana tournament-o bak ra∙gipa pilak maharirang aro sokbagipa manderangkoba Sangma mittelangan baksana a∙dok sorkarini sports-ni a∙bako namdapatna kam ka∙enganikoba aganangaha.
Una agreba football kal∙na sapgipa chadamberangna cholko ra∙banagita Inter Constituency Football League-ko mikkang bilsioni a∙bachengatna miksonganikoba Sangma parakataha. Iako aganengon, a∙dokni dingtang dingtang biaprangona stadium, artificial turf aro gipin kamrangko ra∙bae on∙anikoba ua aganangan baksana Mahari Football Tournament-ko ong∙atna Chief Minister’s Special Grant-nigita lakh 14 ko chamataha jeon bak ra∙gipa dol 57-oni dolpraknan tanga gong 10,000 ko chamataha ine parakatangaha.
Mea∙sa dolrangni kal∙anio Best Goalkeeper-ko Milden Bolwari Marak, Best Player-ko Chekan Tengrik Bolwari Marak, Top Scorer ba goal bang∙bate chipna man∙gipako Marthus Tegite Sangma, Oldest player ba bilsi brebatgipa-ko Billy A Sangma aro niamko nambate ja∙rike kal∙gipa ba Best Disciplined team-ko Dopo mahari man∙angskaaha.
Apsan daken me∙chik dolrangni kal∙anio Best Goalkeeper-ko Ropina R Marak, Best Player-ko Donera Ch Marak, Top Scorer ba goal bang∙bate chipna man∙gipako Tengchira Ch Marak, Oldest player ba bilsi brebatgipa-ko Robita D Sangma aro niamko nambate ja∙rike kal∙gipa ba Best Disciplined team-ko Napak mahari man∙angskaaha.
