WGH Tura District Auditorium-o, ia bilsini SSLC aro HSSLC porikkao topper gadango chu·sokgipa dingtang dingtang skichakram biaponi chatro chatrirangko mande ra·e mittelpilskaani chingita Annual Felicitation program-ko Akhil Bharatiya Vidyarthi Parishad (ABVP) Tura Unit ong·atangaha. Ia program-o chugipa gadango chu·sokgipa chatro chatrirangna Pa Togan Nengminja Sangma Best Student Award 2024-koba on·angaha.
Ia tom·anio Assam Legislative Assembly-ni Speaker Biswajit Daimary, Tura-ni MDC Bernard N. Marak, a·dok ABVP-ni gitcham President Lekhi A. Sangma, ABVP-ni State Secretary Tengku M. Marak aro a·dokni bang·a skichakram biaponi sak 400 mangna bate chatro chatrirang, nama skaniko on·giparang aro sak 100 mangna bate topper gadango chu·sokgiparang bakko ra·angaha. Ia program-ko ong·atanichi chatro chatrirangna chadambe ong·e skie ra·anio rake kam ka·e miksongatangona sokaniko mesokan baksana mikkangchi rakbate kam ka·angkuchina didianiko on·ani ong·a.
Annual felicitation program-ko ong·ataniara skia poraiani gadango bang·bate chu·sokgiparangko nikna man·agita bilsiantian ia program-ko ong·atrongenga. Uamangni chu·sokaniko maniengon, skia poraiani gadango nambate dakangchina aro kim·kim ong·e an·tangtangni miksongatangko ja·rikchina ABVP Tura unit-ni kamrangko ka·enga.
Pa Togan Sangma Best Student Award ge·sa jakgitel ong·atna dakgrikgipa A·chik matgrikni bimungko done uni seng·aniko, bimchipaniko aro dilgipa ong·aniko jolni chadamberang ja·rikchina miksonge dongipa ong·a. Ia programko ong·ataniara porikkao name chu·sokgiparangna aro mikkangchi chadamberangko didianio chu·sokgipa ong·aha.
