GHADC-o kam ka∙giparangna ja 35-ni dormaharangko on∙kujani gimin aro 5th Pay Commission-ko ra∙gatatna ja∙manchakenganina Non Gazetted Employees Association (NGEA) rang jingjengataniko August 19 tarikoni da·ona kingking dakangkuenga. GHADC-o tangka paisarangni mamlarang skangna bateba namjaroroaniko nikna man∙enga ine Meghalaya Pradesh Youth Congress (MPYC) ni Vice President Timjim K Momin parakataha.
GHADC-o chu∙gimik ge 17 department-rangoni Forestry, Land and Revenue, Justice, aro Civil Works department-rangan council-na mongsongbate kajinako ra∙bagipa ong∙a. Indake ong∙engon, nangana batpile kamna rakkiani aro kragija tangka jakkalsretani gimin kam ka∙anio bang∙a neng∙nikanirangko sokataha. Unbaksana GHADC-o financial rule, service rule aro dingtang dingtang niamrangko namdapatna nangchongmotanikoba Momin aganangaha. GHADC-o ong∙enggipa pilak obostarangko niatgenchimode MDA sorkari aro NPP dolchi dilenggipa EC-ni dilna changjani a∙selsa ong∙enga ineba agandapangaha.
Indita bilsina GHADC-ko NPP-ni dilenggipa EC-an chalaigenchimoba, da∙o ong∙enggipa obostarangoniko naljokatna aro nambatatna uamangni ka∙na nanggni daito ong∙oba Council-ko namdapatna maming ja∙kurangko de∙angjaha ine Momin matnangataha.
GHADC-ko nambate chalainagita Garo Hills-ni manderang NPP-na ka∙donge seokgenchimoba maming dingtangataniko nikna man∙jaha. A∙dok sorkari aro ma∙mong sorkarini dakchakachisa council-ko nambate chalaina man∙gen ine CM aro NPP ni dilgiparang council-ni election ong∙na skang katta dal∙bee agangenchimoba maming namdapatanikoba ra∙bajaha. Unbaksana a∙dok sorkariko aro council-ko indita bilsina NPP-ni chalaiengon, GHADC ge∙sa autonomous body ong∙ani gimin uno chagrongenggipa neng∙nikanirangko nirokatna a∙dok sorkarini daito ong∙ja ine batanggimin somoio CM ni agananiko knaa man∙aha ineba Momin parakataha. Ian uamangni council-ko dilna changgijaniko mesokan baksana Garo Hills-ni manderangko election-na mangmangsan tol∙nape ro∙agita ong∙a ineba aganangaha.
Ia pilak obostarangko nigrike, GHADC-o ong∙enggipa mamlarangko namdapatna CM an∙tangan daitoko ra∙e ja∙kuko de∙angchina Momin mol∙molangaha.
