South Garo Hills Chokpot Civil Sub-Division-ni ning·o donggipa ramarang namsrangjani a·selo songdongenggipa manderang bang∙a neng·nikarangko man·enganina sorkariko nirokatchina Garoland State Movement Committee (GSMC), Chokpot Regional Unit-ni Chairman Lusai Ch Marak mol·molataha. Indakgipa neng∙nikanirangko songdongenggipa manderang ru·uta somoirangonin chagrongbaoba ramarangko namdapatna jako ra·e kam ka·giparangni jotton ka·anikoba nikna man·jaha ine Marak aganangaha.
Chokpot ona dakanggipa rama South Garo Hills a·jao gitchambegipa rama ong·genchimoba ia ramani namjabeani a·selo manderangna kenbegnigipa ong·enga maina ia rama a·klok aro a·dubek raragita dakani gimin gari gorarang re·ruraanio namen neng∙nikaniko man∙enga. Ia obostarangko mongsongbate wachi karini somoio neng·nikanirangko chagrongna nangbatronga ine Lusai Ch Marak aganangaha. Indake rama namjani a·selo salantio sanna bannaniko dakna re·rurana nanggipa manderangna mongsongbate an·o donggipa me·chikrangko gipin a·jaona watatani somoirango ta∙rake sanna bannaniko on·a rimangrongna man∙rongja aro ramarang namjabeani gimin a·sel obostao ga·akna kenbegnigipa ong·a ineba agandapangaha.
Rama jal∙angrang mangmangsan ong·aigija network rangkoba tik ong·e watjani gimin Chokpot jolo songdongenggipa manderang bang∙a neng·nikanirangko chagrongna nangenga. Ia pilak kamrangko ta∙raken nirokatchina GSMC dolrang a∙dok sorkariko aro daito donggipa departmentrangko mol·molangaha.
Unbaksana Kakkija, Asakgre aro Budugre-o songdongenggipa manderang rama jal∙angrangko namdapatna Public Works Department (Roads) ni Minister Prestone Tynsong naba chitti-ko sedoangaha. Uamangni agananigitade, Chokpot jolo indita mingsingmingambegipa aro nitobegipa biaprang donggenchimoba rama jal∙angrang namjabeani a∙selo a∙dokna aro jolo songdongenggipa manderangna bang∙a gimaataniko ra∙baenga ineba janapangaha. Jolo tourism ni a∙bako tang∙doatnagita rama jal∙angan gamchatbegipa ong∙a aro mikkangchi ramarangko taridapatgenchimoba komibegipa bilsi 4 ba 5 na bainagitasa ramarangko tarie on∙chinaba mol∙molangaha.
