Anganwadi kam ka·giparangni bang·a neng·nikanirang aro nangnikanirangni bidingo chanchirimna, All Garo Hills AWW Workers & Helpers Federation, mijal salo Tura DC Park-o tom·angaha. Tom·anio bakko ra·na Garo Hills-ni dingtang dingtang bakrangoni watata man·gipa dilgiparang sokbatokaha. Ia somoio uamang an·tangtangni salantio chagrongenggipa neng·nikanirangko, kam ka·aniko namdapatani, apsangrik tangkarangko man·ani, songsalna aro bi·sa chongiparangna uamangni dangdike on·aniko nikchanganirangko agan parakangaha.
Uamangni tom·ani bako Champion R Sangma-ko Federation-ni Executive Committee-na gital Advisor-ni kamko jako ra·na songangaha. Sangma, Anganwadi kam ka·giparangko ku·mongna didiange apsan miksonganina re·mikkange kam ka·na aganangaha.
Tom·anio bang·a dilgiparangan sorkari aro gipin daito gnanggiparangko Anganwadi-rangni nangnikanirangko ma·sipachina aro nirokatpachina aganangtokaha. Ia somoio uamang ru·utbee bilsirangoni neng·nikaniko man·enggiparang, dormaha man·kugijaparang, rika cho·anio komienggipa aro kamrangko name ka·na chu·ongagita bosturang donggijaniko ta·rake nirokatna nangani giminba aganangaha. Iasan ong·aigija Anganwadi-rangni chu·gimik namroroanina aro u·i ma·sianiko bariatna training program-rangko jringna ong·atna nanga ine Federation-ni dilgiparang aganangaha.
