NGH Resubelpara-o Hockey Legend Major Dhyan Chand-ni atchiani salko gisik ra·an baksana National Sports Day-ko maniani bakgita Off Road Cycling ba Cycle salsusaaniko, 10k National Sports Day Run ba katsusaaniko bilsi 12-ni ning·o ong·gipa aro una batgipa me·asa aro me·chikrangna Resubelpara Mini Stadium-o da·al pring 7 bajioni a·bachengatangaha. Ia National Sports Day manianiko District Sports Office, Resubelpara-nigita ong·atangaha.
Ia susaanio wilwilao songdonggipa bang·a gisiko nanggipa chadamberang sokbae bakko ra·angaha. Dal·gimin me·asa dolrangni katsusaanio Harinkata Bakra-ni Santish Pam Rabha skanggipa biapo cheaha. Gnigipa biapko Mendi Salpara-ni Sengnal S. Sangma aro gittamgipa biapko Dilma Apal-ni Kasan G. Momin man·angskaaha. Apsandaken me·chik dolrangni katsusaanio skanggipa biapko Nokat Apal-ni Lailisphina M. Sangma, gnigipa biapko Gajingpara-ni Archana K. Marak aro gittamgipa biapko Babukona-ni Jiasha Marak cheangaha.
Unbaksana bilsi 12-ni ning·o ong·gipa me·a bi·sa dolrangni katsusaanio skanggipa biapko Changteang G. Momin, gnigipa biapko Sengchura K. Sangma aro gittamgipa biapoo Dimchangpiti K. Sangma cheangaha. Bilsi 12 me·chik bi·sarangni katsusaanio skanggipako Ringatchi A. Sangma, gnigipa biapko Brime Sangma aro gittamgipa biapo Rongnamchi Ch. Momin cheangskaaha. Una agreba me·asa dolrangna cycle salsusaatanio skanggipa biapko Bolsaldam-ni Austen K. Sangma, gnigipa biapko darampara-ni Ezarak D. Sangma aro Gajingpara-ni Semion Marak chenagita man·angaha.
Ia minganti susaatanio tangka paisanigita skanggipana 5,000, gnigipana 3,000 aro gittamgipana 2,000 boksisrangko on·angaha.
