Short Duration Discussion-na da·al salo Ardent Miller Basaiawmoit-ni ra·bagipa Dadenggre Sub-Division ni ning·o kragija dake skigipani kamna rimnapaniko matnanggipa kattarangna Education Minister Rakkam Sangma aganchakangaha. 2023 bilsio a·dokni dingtang dingtang a·jarango aro Sub-Division rango hajalsana bate skigipani kamrango rimnapaha jeon 235 post-rangko Dadenggre-naba tikataha ine Sangma parakangaha. Sorkari ia skigiparangko kamrangna rimnapaniko roster system-ko ja·rike aro High Court-ni ge·etagitaan dakangaha ine ua aganangaha.
Ia kamrangna dorgastoko chu·ongagita skia pora, lekka pancha donggiparang aro man·a kragiparangkosa sorkarini donggimin niamo pangchake ra·chakaniko Sangma parakangaha. Apsan daken advertisement-ko 2023, Novermber 2 tariko nakatataoni Dadenggre Sub Division-oba sal chisana interview-rangko ra·angaha ine Sangma agandapangaha. Interview-ni result-ko 2024 bilsini January 10 tariko parakataha jeon sak 190 candidate-rang chu·sokgipa ong·angaha aro appointment letter-ko February 9 tariko on·angaha ine Sangma janapangaha.
Iani gisepon chu·sokgipa sakgni candidate-rang chong·motan Haider Hussain Maula aro Md. Saddam Hussain-ni kosako kakket ong·gijagipa D.El.Ed certificate-rangko jakkalaha ine matnange mokordoma ka·doangaha. Uamangni kosako am·sandianirangko dakna DEO WGH Tura, SDEO Tura aro SDEO Ampati, sakgittamko seoke 2024 bilsini May 13 tariko committee-ko songaha ine Sangma parakangaha. Pilak gadangnigita am·sandianirangko committee dakangani ja·mano Haider Hussain aro Md. Saddam Hussain-ni D.El.Ed certificate-rangko kakketgipa ine ma·sina man·angaha aro uamang bikpil mokordoma ka·doangskaaha ine Sangma aganangaha.
