Tura-ni gital MP Saleng Sangma, Gambegre constistuency-na maming namroro silroroaniko ra·bajanina P. A. Sangma-ni nokdangko dosi gale matnangataha. P. A. Sangma-ni Union Cabinet Minister ong·engmitingo uni nokdangoni Admiral K. Sangma Gambegre constituency-ni dilgipa ong·angaha ine Saleng aganangaha. Gambegre constituency-o P. A. Sangma-ni nokdangna bate batanggimin bilsi 15-o uan kam ka·bataha ineba Saleng Sangma kobor ra·timgiparangna parakangaha. Da·ona kingkingba uni constituency-ni bang·bata ramarangko black-topped taria dongkujanikoba Sangma janapangjolaha.
Uni constituency-o skangni chasongo skulrang donggijaniko ua parakange, da·o residential skulrang aro Pine Mount International skul donganikoba ua aganangaha. Unbaksana, ge·e game cha·giparangna antidamrang, CHC, block, zip-line aro gym centre-rangba dongaha ine Sangma aganangaha. Iasan ong·aigija, skango graduate gadangona poraigiparangko nikna neng·beoba da·o uni MLA ong·ani ja·mano hajalni hajal graduate ong·giparang bang·aha ine Sangma u·iatangaha.
Saleng Sangma, Gambegre constituency-o namdapani donggijanina uko matnangna skang NPP dolko an·tangtangni kamrangko itihaso nichengchina aganangaha. Gambegre by election-na skang sorkarini project-rangko chamatani bidingo aganengon, NPP dolni MLA-rangba Gambegre-gitaan scheme aro project-rangko man·pajaenganina duk ong·chaka ine Sangma agandapangaha.
