South Garo Hills Chokpot jolo sorkarini Lower Primary aro Upper Primary skul nokrang namjabeani a·selo bida budiko ra·enggipa chatro chatrirang namen neng·nikaniko man·enga ine GSU Chokpot Regional Unit-ni General Secretary Spensar R. Sangma koborna parakataha.
Ia skul nokrang badiaba nokking sela, nokking dongja, kelki do·ga dongja, pakmarang be·a aro adita skul nokrangode asongchakanirangba dongjaenga ine Sangma u·iatangaha. Indakgipa LP aro UP skul nokrangko a·dok sorkari maina nichanggalenga aro uarangko taridapna ma·mong sorkarioni chamatgipa tangka paisarang bachi maidake gimaenga ine sing·doangaha.
Skulni somoio skigiparang class-rangko ra·engon mitam skul nokrango nokking dongjae mikkachi chakesa class-rangko ra·enga aro bi·sarangba apsandaken mikka wadapako chakna nangenga ine janapataha. Ia obostarangara bi·sarangni mikkangchi dal·gni chugnina tariengon aro an·tangtangna seng·aniko skie ra·engon nirokani dongjani a·sel indakgipa neng·nikanirangko chagrongna nangao ga·akenga.
Chatro chatrirangni skie ra·chakenggipa skul nokrangko ta·rake nirokate taridape on·pachina GSU Chokpot Regional Unit-ni General Secretary Spensar R Sangma, a·dokni CM Conrad Sangma-ko mol·molangaha.
