Meghalaya a·dokni Congress dolni sakgni MLA-rang chong·motan Charles Marngar aro Gabriel Wahlang, Dr. Celestine Lyngdoh baksa NPP dolo Shillong-ni NPP-ni office gitalo da·al attamni gisepo bakrimeaha. Uamangko batanggimin salrangonin NPP baksa sepange kam ka·anirangna matnange aro bakrimna am·anirangko ma·sisoe Congress-o bak ong·e dangdikaniko bilsi 6-na dontongataha.
Nongstoin-ni MLA Gabriel Wahlang, Mawhati-ni MLA Charles Marngar aro Umsning MLA Dr. Celestine Lyngdoh, Assembly Speaker Thomas Sangma-ko gronge NPP dol baksa bakrimna dakna nanggnirangko matchotataha. Da·o uamang sakgittamni NPP dolo bakrimeanichi Meghalaya a·doko Congress dolo saksa MLA aro saksa MP-san dongaiaha. NPP party-chi dilenggipa MDA sorkari chu·gimik sak 28 MLA-rangoni, da·o sak 31-ona tang·doangskaaha.
Da·alo NPP party-ni office-ona Chief Minister Conrad Sangma, Deputy Chief Minister Prestone Tynsong aro Sniawbhalang Dhar, Rajya Sabha MP W. Kharlukhi, Power Minister AT Mondal, aro gipin dilgiparangba dongpae bakko ra·angaha.
