Garo Hills Autonomous District Council (GHADC)-o kam ka·gipa Non Gazetted Employees Association (NGEA), uamangni dabianirangko on·kujaengani gimin salbongana jingjengatangna da·al August 19 tarikoni a·bachengataha. Batanggimin ru·utbea somoirangonin daito gnanggiparango uamangni nangnikanirangko dabigenchimoba mamingkon daka dongkujaengani gimin ja·ku de·taina nangaona sokaha ine NGEA-ni President Brithen M. Sangma parakangaha.
NGEA-rangni jingjengatani ja·pangara uamangni man·a nanggni ja 34-ni dormaharangko on·kujaenganina aro 5th pay commission-ko da·onaba ra·gatkujaengani a·selo ong·a. 5th pay commission-ko on·china ge·etanirang sokahaoba 4th pay-kosa uamangna on·kuenga aro on·genchimoba jarikkit on·ja ine Sangma janapangaha. Badiaba somoirango ja 5 ba ja 6-ni gisepo dormaharangko on·enga aro ia bilsio ja 3 ni betonkosan man·kuenga ineba Sangma agandapangaha.
NGEA-ni President, pilak songdongenggipa manderangko uamangni salbongana jingjengataniko dakengon office-ni kamrangna nanggenchimoba chakchikpachina mol·molataha. Dormaharang man·gija chakchike kamrangko ka·ahaoba da·onaba uamangni man·gnirangna dabianiko darangba niatgipa dongjae salantio janggi tanganioba namen neng·nikaniko man·enga ine Sangma aganangaha. NGEA-ni dabiagita mikkangchiba maming ja·kurangko de·jaode jingjengataniko dakangkuna miksonganikoba Sangma bon·kame parakangaha.
