Tura traffic police-rang baksa rakkigipa Home Guard rangni jabrina dormaha man·kujaenganiko Chief Minister-na janapatani ja·mano daito ga·akgipa Minister Comingone Ymbon, Meghalaya Home Guard-o ge 445 bangbanggipa kamrango gapatna miksonganiko parakataha. Indake ong·genchimoba Minister, dormaha man·kujaenga ine Home Guard personnel-rangni matnanganikode jegale aganangskaaha.
Home guard-o ge 445 nakatnasienggipa kamrangara Sub-Inspector, Guardsman, Driver aro Non-Combatant Employee-ni post rangna ong·gen. Ia kamrangna pilak India a·songo songdongenggipa Meghalaya a·dokni manderang jemangan bilsi 32 aro uni ning·o ong·giparang galatna man·gen.
Minister, Comingone Ymbon-ni u·iatanigitade ia kamrangna rimnapaniko ia bilsini September jaoni a·bachengatgen ine parakataha. Gitalgipa kamrango home guard-rangko rimnapanichi police department-o mande komianiko kolgapatna man·gen mongsongbate traffic-na dakchakbeani ong·anggen ine Minister aganangaha.
