Re·anggipa July 29 tariko, dumper truck bolsa Chondonpara songo A·chik chadambe saksako salpake siatgipani bidingo Monabari thana-ni OC-ko gronge ta·rake am·sandianiko dakchina A·chik State Peoples’ Front (ASPF) dol didiataha. A·selo ga·akgipa bilsi 30 ong·gipa Bilsrang R. Marak, South West Garo Hills, Chondonpara songoni Dalbinson Momin-ni depante ong·a. Ia obosta attam 5:30 bajimango ong·aha jeon mande a·damon sikamaha aro dumper-ko salgipako rim·rikna man·jaha.
Sangma, uni bike-o songtang Chondonpara-oni Garobadha-ona re·angmitingo tempo ge·sako batsekna am·on dumper truck rama samsagita re·baani a·selo chatinggrikaha. Nikgiparangni agananigitade dumper truck Mankachar-Baghupara ramako re·angenga ine parakataha.
Ong·a obostao dos donggipako rim·nagita ASPF dolrang police-rangko pilak nanga sakkirangko am·na CCTV-ni video-rangko sandichina mongsongbate Borkona SBI bank-niko nichina aganangaha. Motor Vehicle Act, 1988 section 134-o dongimin niamrangko ja·rikgija pe·ahani gimin dumper-ni manderangko ta·rake am·sandichina uamang didiataha. Unbaksana, mikkangchi indakgipa apsan a·selrangko chagrongtaina nangjanagita dumper truck-rangni re·aniko niroke somoigita watchinaba mol·molangaha.
