West Garo Hills Rome Agalgre jolo chatro chatrirang salantio skulona re·rurana chu·ongagita para garirang dongjan baksana ning·o gae re·na chakpiljae nokking kosakrango gadoe re·na nangao ga·akenga. Indake gari nokking kosako gadoe re·aniara uamangna namen kenchakani ong·ani gimin Rome Agalgre Regional Unit-ni A·chik Progressive Approach (APA) dolni President Sengkambal Ch. Sangma WGH Dadenggre-ni Sub Division Officer-ko nirokatchina chitti see mol·molangaha.
Chatro chatrirangni skul uniform-ko gane bus garini nokking kosakrango gadoe re·na nangao ga·akaniara uamangni cholon bewalko ong·siatan baksana namen kenchakani ong·a. Ia bi·sarangni bus nokkingo gadoaniara Meghalaya Transport Department, skulni dilgiparang aro bus nokgiparangni simsakgijani a·sel ong·enga ine Sangma janapataha.
Ia neng·nikanikrangko chel·atna aro chatro chatrirangni skulchi re·ruraanio a·sel ong·gnioniko naljokatna man·agita Meghalaya Transport Department-nigita bus garirangko bariatchina mol·molangan baksana para gari salgiparang skul re·gipa bi·sarangni kosako nirok simsakchina APA dolni President didiangaha.
