East Garo Hills Ganingbibra songo ma·mong sorkarini chamatgipa Jal Jeevan Mission (JJM) project-ko jako ra·e kamko ka·enggipa contractor aro Department-ni officer-rangni ong·gija dake jakkalsretenganina Garo Hills Youth Solidarit (GHYS) ni President Endick Marak jegalataha.
Ia scheme-ko miksongani gnang kamrangko ka·na ma·mong sorkari chamatgenchimoba jako ra·e kamko ka·gipa contractor name chu·soke aro matchotate on·jaha jeon chi chimongchakna chonbee tariaha, chi salna tekgipa pipe-rangko bolrangni kosakgita tarie on·aha, chi jokchakgipao maming platform-ko tarie on·jaha ine Marak janapataha. Unbaksana kam ka·ani matchotani report-ko name nirikkianiko dakjan baksana project-ko matchotmanoba chirangna neng·nikanirangko man·kuenga jeon contractor-ni kam ka·ani namjani a·sel ong·aha ineba Marak u·iatangaha.
Una agreba contractor-ni project-ni chu·gimik bill-rangoniko Village Water and Sanitation Committee (VWSC) na 5 % chamatna nanggipakoba sokatgija jakkalsretani a·selo uamang an·tangtangni tangkarangko jinma gilchimonge pipe-rangko taridapanio jakkalna nangaha ine Ganingbibra songni VWSC-rang u·iatangaha. Ian Garo Hills gimiko JJM-ni kamrango tangka paisarangko jakkalsretaniko bang·a changon niknagita man·engani gisepon ia kragijagipa kamrangni kosako Court-ona sokatana agre maming chol dongja ine GHYS-ni President Endick Marak aganangaha.
