Da·al salni pring 11 bajimangoni Meghalaya State Skills Development Society (MSSDS), Labour Department, Employment and Skill Development-nigita Tura District Auditorium-o Job Fair-ko ong·atangaha.
Ia Job Fair-ko MSSDS, Labour Department-ni ning·o India a·songni a·palo jekai UK, Japan, Germany, Saudi Arabia, Singapore, Europe aro gipin a·songrango healthcare, hospitality, sales, customer care, event management, retail management, manufacturing, aviation, IT, construction aro logistics-ni department-rango kamrangko ka·na cholko on·ani ong·a.
Ia program-ona Chief Minister Conrad Sangma mongsonggipa sokgipa ong·e job fair-ko oprake on·angaha. Apsandaken, a·jani Deputy Commissioner Jagdish Chelani, official-rang aro gipin dal·dalgipa manderangba sokbae ia Job Fair-o bakko ra·angaha. Dingtang dingtang biaprangoni sak 700 mangnigita chadamberang Job Fair-ni bidingo u·ie ma·sie ra·nagita re·bae bakko ra·angaha.
Battanggimin salrangoba a·doko bang·a kamgri dongenggipa chadamberang Job Fair-o bakko ra·enba Japan aro Singapore-rango kamrangko ka·na seokako man·angaha. Ian a·doko kamgri dongenggipa chamdamberangna mingsa nambegipa cholko sorkarinigita on·enggipa ong·a.
