South Tura constituency-ni Mondoltilla gittimo Tura Water Supply Scheme-ni ning∙o tarigipa chi chimongchakram-ko Chief Minister Conrad Sangma oprake on∙angaha. Ia project-ko rikna chu∙gimik crore 1.43 tangkarangko chamangaha ine CM aganangaha.
Ia chi chimongchakramo 1.5 lakh litre mangni chirangko chimongna chakgen jean South Tura-ni Mondoltilla, Lower Hawakhana aro Rishipara gittimrangna chirangko sokatna dakchakanggen.
China neng∙nikanirangko komiatna man∙agita indakgipa chi chimongchakramrangko ru∙uta somoirangnan dabiani donga. Iani gisepon ia project-ko ra∙baanichi rika cho∙anirangko matchotate on∙a man∙anian china dilaniko olgrokatna kam ka∙ani ong∙a ine Sangma aganangaha.
