July 20 tarik, Sonibar salo Trading for Non-Tribals (TNT)-ni bidingo chanchirimna aro mikrakataniko on∙agita A·chik Conscious Holistically Integrated Krima (ACHIK) dolrang Dainadubi-o ong∙atangaha. Ia tom∙aniko ong∙atna miksonganiara Nokma, Lasker, Sordar, songni manderangna aro jolni NGO dolrangna TNT-ni bidingo name tale ma∙sie ra∙na man∙agita dakangaha ine ACHIK Northern Zone-ni Co-Chairman Rorok R. Marak parakataha.
TNT-ni gamchataniara GHADC-ko tangkame rakkianisan ong∙aigija A∙chik jat gimikna gamchatgipa ong∙a ine ACHIK-ni General Secretary K A. Sangma agnangaha. Bading chiwalanio gipin jatrangni mikkang nitee aro A∙chik a∙songo songdongenggipa manderangni kosako kam ka∙anirangko TNT-nigita nigrike kamko ka·na man∙a.
Ia tom∙anio Sixth Schedule-o ga∙akgipa jolrango maikai TNT-ko jakkalangani itihas aro ja∙pangni bidingo ACHIK dolrang talataniko on∙angaha. Iarangni bidingo mikrakataniko aro u·isamsoataniko on∙anichisa manderang iani chu∙gimik bilko ma∙sina man∙gen ine u∙iatangaha. Ia TNT-ni niam aro ja∙rikna nangchongmotgipa kamara a∙palni manderangni songdongenggipa manderangni kosako kam ka∙anirangko champengani ong∙a ineba janapangaha.
GHADC-ni Deputy CEM Nikman Ch. Marak mongsonggipa ong∙e soke indakgipa mikrakataniko Garo Hills-ni kona noksik gimikon ong∙atna nanganikoba aganangaha. Indakgipa ma∙sie ra∙anirangko da∙oni chasongo dal∙e ra∙jani a∙selo A∙chikrang gipin jatrangni onia ka∙aniko man∙enga ineba Marak janapangaha. Nokma, Lasker rang iani bidingo name tale ma∙sie ra∙genchimode aditan ka·kime kamrangko ka∙angna man∙ani gisepon gipin jatrangni A∙chikrangni kosako kamrangko ka∙aniko aro kajinako gimaataonikoba champengna man∙gen ine ua agandapangaha.
Bon∙kame ACHIK North Garo Hills District-ni Co-Chairman Rorok R. Marak, tom∙anio bak ra∙gipa manderangna, mongsongbate Nokma aro Lasker-rang baksa iani bidingo mikkangchi nambate talataniko on∙angna ku∙mikchetangaha.
