Nongchram Deficit U.P. skulo Hindi subject-ko skigipani kamna School Managing Committee (SMC) rangni mikkang nie rimnapa ine AHAM Rongjeng Regional Unit-ni matnangatanina skulni SMC aganchakaniko dakatskaaha.
Uamangni aganchakatanigitade, advertisement ka·anio nanggipa qualification jekai B.A degree, D.El.Ed, B.Ed, MTET, CTET, Bisharad aro Praveen course rango pass ong·giparangko janapani gnang ine aganaha. Iani gisepon Hindi subject-ko skina post nakatanina dorgastoko galgipa candidate-rangara advertisement-o janapgimin qualification-nigita chu·ongjani a·selo kamo rimnapna man·jaha ine SMC aganangaha.
Indake skulo skigipani kamna rimnapnagita dorgasto galgiparang nanggipa qualification dongjanina, skulni SMC-rang baksa adita chanchirimaniko dakangaha ine u·iatangaha. Ia tom·e chanchirimanio Nongchram songoniko jik ra·e songdongkamenggipa saksa jean skigipani kamko ka·enggipa ong·an baksana nanggipa qualification donganina uko rakkichina SMC-rangni didiako man·e pilakan ra·chake seokangaha ineba janapataha.
Unbaksana ua skigipako gipin skulrango skianioba tik ong·ja ine matnangataninaba iani bidingode darangba u·iani dongja ineba aganaha. Bon·kame mikkang nie songoni mandeko rakkia ine AHAM dolni matnanganiara kakketgipa ong·ja aro nanggipa qualification dongani giminsa rakkiaha ine Nongchram Deficit U.P. skulni SMC parakataha.
