Rongjeng-Bamil Adokgre-o km 2 ong·gipa ramako tarienganiko PWD Williamnagar Division-oniko PWD Mawshyrnut Division-ona ra·angskaenganina A·chik State Peoples Front (ASPF) dolrang raken jegalaniko dake EGH PWD Department-ni Sub-Divisional Officer-na chittiko sedoataha.
Rongjeng-Bamil Adokgre rama jean Garo Hills-o songdongenggipa manderangni bading chiwale cha·anio, gari gorarangni re·ruraanio aro salantio nangana jakkalenggipa mongsonggipa rama dilsa ong·a ine ASPF dolrang janapataha. Ia rama tarianiko gipin division-ona ra·angskaaniara songdongenggipa manderangna neng·nikanirangkosan ra·baaigija nangchongmotgipa kamrangko dangdike on·e a·dokko silroro namroroatna jotton ka·e kam ka·anikoba champengatani ong·gen ineba janapangaha.
Garo Hills a·jarango bang·a taridapaniko nangan baksana rika cho·anirangkoba bariatna nangenga. Indake ia rama tarianiko gipin division-ona ra·anganiara songdongenggipa manderangni nanganirangko, gamjinrangko aro gimiknigitan tang·doanirangko ra·angagita ong·enga ineba aganangaha. Iani bidingo a·dok sorkari ta·raken nipilaniko dake ia project-ko nirok simsakate nangchongmotgipa biaprangna chu·sokate on·a man·agita PWD Williamnagar Division-na jako ra·e kamko ka·anganiko dakataichinagita ASPF dolrang mol·molangaha.
