Ma·mong sorkarini chamatgimin JJM-ni kamrangko Chiokgre songo matchote ka·e on·janina contractor aro department-ni officer-rangni kosako Garo Hills Youth Solidarit (GHYS)-ni President Endick Marak matnange jegalaniko dakangaha. Jako ra·e kamko ka·enggipa contractor-na chu·sokate kamko ka·nagita scheme-rangko on·atgenchimoba, Chiokgre songo chiko chimongchakna rika cho·anirang dongkuja, chirangko watkuja aro JJM-ni ge·etanigita chu·ongagita pipe-rangko sale on·kujaenga ine Marak aganangaha.
Indake songni manderangni neng·nikanirangko u·iatgenchimoba, Department-ni dilgiparang maming sinjetaniko on·jaha. Unbaksana a·jani Deputy Commissioner-na uamangni neng·nikarangko janape lekkarangko on·ahaoba maming aganchakani dongja aro da·o ong·enggipa MLA jean PHE-ni Minister-ba ong·engachim uaba songni manderang baksa mamingkoba mikkangchakgrike agangrikanirangkoba daka dongkuja ine Marak aganaha. Ma·mong sorkarinigita bang·a namgnirangko chamatgenchimoba JJM project-nigita chirangko man·jaenganina aro contractor-rang kamko name ka·e on·jani a·selo neng·nikanirangko chagrongna nangenga ine Marak aganangaha.
Ia nangchongmotgipa obostarangni bidingo ta·raken contractor-ni kam ka·ani bidingo am·sandianirangko dakchina , JJM project-ni kakketgipa report-ko on·china aro tangka paisarangko jakkalanirangko nirokatchina didiatan baksana ia project-ni chu·sokgijaniko National Jal Jeevan Mission (NJJM) ni Director-na nanggipa ja·kurangko de·china u·iatanggen ine GHYS-ni President Endick Marak aganangaha.
