A∙dokko chalaienggipa NPP-ni MDA sorkari batanggimin somoio sorkarini Lower Primary skul rango jeon poraienggipa bi∙sa saksaba napgipa dongjani a∙sel skulrangko chipna tik ka∙angaha ine Education Minister parakangaha. Indakgipa ja∙kuko de∙aniara a∙dokni bi∙sarangna namgipa gadangni bidarangko sorkarini on∙a miksonganiko sing∙dona nangao ga∙akenga ine saksa Social Activist Cherian Momin aganangaha.
Poraia skianiko man∙anian songsalo chadamberangna u∙ie ma∙siani, bilko on∙ani aro uamangna mikkangchi janggi tangani cholrangko man∙a dakchakaniba ong∙a.
Bi∙sarangni skulrango admission ra∙gipa dongjani gimin ia skulrangko chipna tik ka∙anian sorkarini poraia skianiko skanggipao done kam ka∙aniko mesokengama ine Momin sing∙doangaha. Iarangko tik ka∙na skang maini bidingo bi∙sarang skulrango napjaengani ja∙pangko sandina nangao ga∙akjama aro badiaba songrango chol ong∙gijagipa bi∙sarangni poraina skaniko cha∙sotagita ong∙jaengama ineba Momin sing∙doangaha.
Skulrangko chipe donatanian chatro chatrirang, nokdangni manderang aro songsalna namen neng∙nikaniko ra∙baa. Uasan ong∙agija sepang jolo skulrang dongjagenchimode chatro chatrirang chel∙gipa ramarangko re∙esa poraina nangan baksana bi∙sarangni poraianiko dontangataonaba sokatgen ine agandapangaha.
Pilak bi∙sarangan poraia skianiko man∙a kragipa ong∙a ine Constitution-o se∙gataniko an∙ching nikna man∙a. Iani gispeon indake skulrangko chipatna skang sorkarinigita dingtang cholrangko am∙sandianiko dakangahama aro mikkangchi poraienggipa bi∙sarangni poraia skiani a∙bako namdapatna maidakgipa cholrangko ra∙bana miksonganikoba Momin sing∙doangaha. Ia pilakon name nigrike a∙doko songdongenggipa manderangni ku∙rangrangko knachake aro bi∙sarangni mikkangchi maikai nambata gadango poraina man∙ani cholrangko nipiltaie sorkariko kam ka∙angchina Momin didiangaha.
