South Garo Hills Chokpot Block-ni ning·o donggipa songrang jekai Durabanda, Awegre, Anchigre, Pasimgre, Rongchangre, Danagre aro Mekalpagre, Nokrek National Park ni a·bri jareto ga∙akgipa songrang ong·a. Ia songrang Tura songjinmaona km 30 mangnigita chel·grika. Ia songni ramarang Chokpot-o bon∙chotegipa ong∙a jekon chengonin “Raja Rama” ine bimung donbaaha. Dilgiparang aro officer-rangni ia ramarangko galchipe donani a∙selo da∙ona kingkingba ramarangni namdapaniko nikujaenga ine Nokrek Area Development Committee, South Garo Hills-ni Secretary Chegan Marak parakataha. Mikkangchi ia ramrangko tarie on∙chinagita, Garo Hills-ni MP Saleng Sangma-na chitti-ko sedoate mol∙molataha.
Indake ramarangko galchipe donani a∙selo salantini nanggipa kamrangna re·ruraanio songdongenggipa manderang neng·nikaniko man·tokenga. Unbaksana ia songo donggipa manderang bang·batan game cha∙giparang ong∙e uamangni me·su samjakrangko antirango pale kamaigiparang ong∙a. Indake ong∙engon wachi karini somoio ramarang namjani a·sel gipinoni re·bagipa bading chiwalgiparang re·na dona mandikaniko pa·sike uamangni game man·gimin me·surangko dam komiao ra∙ani gimin gamgiparang namgipa damo palna neng·nikaniko man·enga. Ia mesu samjakrangko palnagita uamang Tura bajar-o mongsongbate pangchakronga ineba janapataha.
Wachi karirango gari gorarang re∙na dona man∙jani a∙selo chatro chatrirangba skulrangona re·rurae porikkako sena neng∙nikaniko man∙an baksana nangchongmotgipa somoirango sanna bannanina rimangnaba ambulance-rang re∙na man·jani a·selo hospital-ona sokatna neng∙nikaniko chagrongenga ine parakataha.
Unbaksana ia jolrango ramasan ong·aigija jal·angrangkoba tarichipgija donani a·selo biap damsaoni damgipinona nengrae re∙na dona man·rongja. Ia songrango adita tourism-ni a∙damrangko tang∙doatna kragipa biaprangba gnang jekai Bandari Falls aro dingtang dingtang nitobegipa biaprang songni nokni manderangna nama janggi tangani cholrangko ra∙dona amachim ineba u∙iatangaha. Ia pilak neng∙nikanirangko janapate iarangni bidingo ta∙rakkale nirok sandianiko dake nanggipa ja·kurangko de·e kamrangko ka·chinagita Marak chittio janape mol·molangaha.
