Tura-ni MP Saleng Sangma, West Garo Hills a·jani a·kawe jolrango chi bana ong·e neng·nikaniko man·enggipa biaprangona re·ange nirokaniko dakangaha. MP baksa ia somoio, MPCC ni Working President, Deborah Marak, gitcham MLA S. G. Esmatur Mominin, a·jani official-rang aro songni nokni dilgiparang Rajabala, Phulbari aro Tikrikilla songrangona re·angaha.
Songni manderangni agananigitade ian Garo Hills-ni MP rangoni skanggipa a·kawe jolrangona re·ange chi bana ong·gipa biaprangko nirokaniko dakchengani ong·a ine koborna parakataha. Ia chang Garo Hills-ni bang·a biaprangon mikkarang jimbee waangani a·selo bilongen nisiatako man·angaha. Da·ona kingkingba a·kawe jolrango mongsongbate Selsella, Rajabala, Phulbari aro Tikrikilla jolrango chirang dal·kuenga, aro manderang neng·nikaniko chagrongangkuenga.
Saleng Sangma, songni manderang baksa golpogrikange manderangni agananiko knae ra·ange uamangni neng·nikanirangko nirokatna pilak nanggipa kamrangko dangdike on·a ku·chakangaha. Unbaksana, bilsirikitan indakgipa a·selrangko chagrongengani gimin manderangni neng·nikanirangko chel·chakna maming dakgipa project-rangko ra·bae on·jani bidingoba Saleng Sangma sorkarini kosako aganangaha. Project-rangko ra·bae on·gijanian sorkarini daito donggijaniko mesoka aro a·kawe jolrango chi bana ong·aniko nikgija dakani ong·a ine Sangma matnangataha.
