A·dok sorkari bil donggenchimoba, Primary School aro Primary Health Center-rangko mikkango done namdapatani kamrangko ka·jaenga ine Tura-ni MDC Bernard Marak adita skul nok aro sanchakram biaprangko re·ange nirokeani ja·mano aganangaha. ADC-ni bilko jako ra·e a·dok sorkari nirokgenchimoba, election-ni somoio manderangna ku·chakgiminrangko chu·sokate on·jaengani gimin Primary School aro Primary Health Center-rangko nirokna a·dok sorkari ADC-na pakwate on·pilna nanga ineba Marak aganangaha.
Ia ge·gni department-rang ADC-ni jako ra·e ka·na nanggipa kam ong·genchimoba a·dok sorkarini jako ra·e kam ka·anichi ma·mongoni chamatgimin tangka paisarangosan pangchake kajinarangko dingtang dingtang bewalrango gilgenchimoba maming dakchakaniko man·jaenga ine Marak aganangaha.
Indake ong·engon cholgrigipa nokdangrang detangtangko nama skie ra·aniko man·a private skul-rango watnagita korosrang chu·ongjae chol ong·pagijaniko sakantian u·ia. Primary skul-rangko simsak niroke kamrangko ka·e namgipa skie ra·aniko man·genchimode dedrangko dal·atna chuatna man·a amgenchim ine Marak aganaha. Politics-ni dilgiparang poraia skiani aro sanchakram biaprangko namdapatna ku·chakgenchimoba darang dilgipani gisiko nange on·gilpaani aro krengdilani dongkujaenga ineba Marak agandapangaha.
