July 6 Sonibar salo, Tura Municipal Board (TMB) baksa adita dolrang jekai FKJGP, ADE aro A·chik A·song Environment Enthusiast Society (AAEES) bakrime pringni 8 bajimango a·bachenge rongtalatangaha.
Araimile-o ian skanggipa changna TMB nigita rongtal an·talaniko dakchengani ong·a. Apsan dake ia kamko Tura jilani dingtang dingtang biaprangoba ong·atenga aro ong·atangkugen ine TMB nigita aganangaha. Ian Swachh Bharat Abhiyan Mission 2 nigita India a·songko rongtal an·talatna ma·mong sorkari ge·etanio pangchake dakengani ong·a. Ia kamko pilak India a·songni a·dokrango a·songko rongtal an·tale rakkinagita dakangenga.
Tura songjinmao dingtang mancha jabol galchakram biapko tarie on·china aganon, TMB nigita gittimantiona dingtang mancha jabolrangko galna tarie on·aniko Swachh Bharat Abhiyan Mission 2 nigita dontongataha ine aganangaha. Iani gisepon Tura songjinmao da·o songanti nokantiona jobol salgipa garirangko watenga ineba aganangaha. Unbaksana je biaprangona garirang sokna man·ja ua biaprangona tela garirangko sokatskaenga ineba aganangaha.
Una agreba da·o dipet jabol salgipa garirang Tura jilana chu·ongagita dongkujani gimin mitam biaprangona anti changgni ba changgittamrang wataniko dakenga ine agandapangaha.
