Batanggimin salrango mikkarang jimbee waanio chi dal·e bana ong·anio neng·nikaniko man·e nokgri jamgri ong·e donggiparangna Rerapara C&RD block-ni ning·o ong·gipa Garomara, Garobadha aro Modhupara songrangni ge 266 nokdangrangna nanggipa cha·ani aro ringani chirangko sualangaha. Ia neng·nikaniko man·enggipa nokdangrangna bosturangko sualaniko Rerapara block-ni BDO aro Executive Magistrate Armand Ch. Momin nirokaniko dakangaha.
Ia ge 266 nokdangrangni sak 1,722 mang manderangna da·al pringni bako, Gratuitous Relief (GR) ko chong·motan nangchongmotgipa cha·ani ringanirangko sualangaha. Iamangan chi bana ong·anio jang·nange janggi tanganio neng·nikaniko man·batgiparang ong·a. Ian neng·nikaniko man·enggiparangni janggi tanganina adita dakchakani ong·a aro mikkangchi uamangna nanganirangna dakchakaniba ong·a.
